101 ka mga nakalapas sa balaod, nasikop sa usa ka semanang anti-criminality operation sa kapulisan sa Bukidnon

Muabot sa 101 ka mga indibidwal nga nakalapas sa balaod ang malampusong nasikop sa mga kapulisan human ang usa ka semanang anti-criminality operation sa Bukidnon-PNP sa nakalabayng semana.

Sa report nga gipagula sa kapulisan ning probinsya, pinitsahan Enero 23 hangtud 29, ning tuiga, 35 ka mga drug buy-bust operation ang gipahigayon diin mutimbang sa 69.03 gramos nga mukantidad sa kapin 400 mil ka pesos ang nakompiskang illegal nga drogang shabu.

Samtang 39 usab ka mga tag-as ug mugbo nga kalibre sa armas ang narekober ug gipangsurender sa mga nakalapas sa balaod.

Gipaniguro ni PCol. Reynante R. Reyes, Provincial Director sa Bukidnon PNP, nga mas pakusgan pa sa hugpo ang ginapahigayon nga Simultaneous Anti-Criminality Law Enforcement Operation (SACLEO) sa probinsya sa pakigkoordinar sa ubang mga tinugyanan sa balaod aron nga masiguro nga mapabilin ang kahusay ug kalinaw sa Bukidnon.