Patay ang 11 ka mga gituohang miyembro sa ISIS Inspired Group nga Bangsamoro Islamic Freedom Fighters (BIFF) human sila gipabuthan sa military gamit ang mortar ingon man rocket assault sa militar sa probinsya sa Maguindanao.
Subay sa report gikan sa Tactical Command Post ilawom sa 601st Brigade, Philippine Army nga gisulong sa mga teroristang BIFF ang kampo sa military sa gibana banaang mukabat sa 50 ka mga BIFF ang Kato Detachment sa 57th Infantry Battalion Philippine Army og Citizen Armed Forces Geographical Unit (CAFGU) sa Mount Firis nga anaa nahimutang sa boundary sa Datu Hoffer, Datu Unsay og Datu Saudi Ampatuan, Maguindanao.
Abtik usab nga nakaresponde ang duha ka mga Agusta 109 helicopter gunship sa Philippine Air Force (PAF) kung asa gibomba ang lugar nga gikahimutangan sa mga terorista.
Nagpalupad usab ang military og mga bala sa 105 mm Howitzers Cannon punterya sa posisyon sa BIFF. Dugang pa sa report sa military nga halos magbuntag ang natigayong binakbakay og naundang lamang sa dihang miatras ang mga BIFF nga gipanguluhan ni Kumander Bungos.
Kahibaluan nga mukabat sa kapin 300 ka mga pamilyang lumad nga Teduray ang mihikling kaniadto gikan sa Mount Firis human sa sunod-sunod nga pagpangatake sa BIFF sa kampo sa militar og CAFU kung asa gisunog pa sa mga terorista ang 19 ka mga panimalay sa mga sibilyan.
Sa pagkakaron mihatag na og ayuda ang lokal nga panggamhanan sa mga residenteng anaa sa mga evacuation centers. (Emir Bariquit)
