11 ka mga pasaway ukon delinquent employers sa siyudad sang Iloilo kag sa banwa sang Pavia ang gin-isyuhan sang show cause order sang Social Security System ukon SSS.
Ginpangunahan ni SSS President Aurora Ignacio ang Run Against Contributions Evaders ukon RACE team sang ahensya ang pagpadulong sa mga establisimiento nga nagalapas sa SSS law.
Sa siyudad sang Iloilo, ang mga establisimiento kag opisina nga ginpadulungan sang SSS RACE Team ginalakipan sang Ted’s Old timer Lapaz Batchoy-Valeria; MD Force Security Agency sa Luna St., Lapaz; kag One star Household Merchandise sa Q. Abeto St., Mandurriao.
Samtang sa banwa sang Pavia amo naman ang Puricare Industrial Enterprises; Appoland’s Pizza; Reymaries Bread; HDH Merchandising; Tamaraw Metal Craft; I-Buy Novelty; Pancit-Pancit kag Uncle Serbad’s Lechon House.
Ang nasambit nga mga establisimiento ang wala nagasunod sa Social Security Act base sa ginhiwat nga preliminary inspection kag wala gihapon nagtuman apesar ginpadal-an na sang notice sang ahensya.
Ginpahayag ni SSS President Aurora Ignacio nga katuyuan sang ila tikang nga ipahanumdum sa mga natungdan nga employers nga dapat bayaran ang bulanan nga kontribusyon sang ila mga empleyado.
Ginmanduan man ang mga natungdan nga establisimiento nga magpaathag sa sulod sang 15 ka adlaw kon nga-a indi sila dapat pagpasakaan sang mga kaso kriminal, sibil kag administratibo sang SSS.
