Mikabat na sa 125 ka mga pasyente ang na-admit sa Northern Mindanao Medical Center sukad niadtong Enero hangtud ning bulan sa Mayo samtang nagpadayon ang gobyerno sa kampanya batok sa Coronavirus Disease o COVID-19.
Matud ni Dr. Bernard Rocha, Medical Specialist II sa NMMC nga upat ang bag-ong nadugang sa maong ihap sa mga pasyente nga gidudahan nga gitakboyan sa sakit nga Covid-19.
Gibutyag ni Rocha nga gikan sa maong ihap 13 ka mga pasyente niini ang nagpositibo sa Covid-19, usa ang nagpabilin nga admitted, upat ang patay ug walo ang naka-recover.
Matud ni Rocha nga gikan sa maong gidaghanon ang ilang suspek sa covid, 15 ka mga pasyente samtang 97 ang nag-negative sa ilang swab testing. Sa pagsulat ning balita, mikabat pa sa 17 ka mga pasyente ang na-admit sa NMMC ug upat niini pulos bag-ong pasyente sa labing dakong government hospital sa Amihanang Mindanao.
