Guipos, Zamboanga del Sur – BITBIT ang dagkong mga armas gipresenta sa kasundaluhan sa 53rd Infantry ‘MATAPAT’ Battalion ang trese ka mga giingong sakop sa New People’s Army (NPA) nga mibalik na sa sabakan sa gobyerno.
Ang mga nitahan pulos mga sakop sa NPA ubos sa SYP KARA nga naglihok sa rehiyon 9 partikyular sa probinsya sa Zamboanga del Sur. Ang ilang pagsurender gipasilitar ni Lt. Col. Marlowe Patria ang Battalion Commander sa 53rd IB nga nakabase sa lungsod sa Guipos.
Pipila kanila nidala sa ilang calibre 45 nga pistola, granada ug usa ka carbine diin atol sa presentasyon sa mga nitahan gipapanumpa sila nga mosuporta sa programa sa kagamhanan.
Sa interview sa RMN Pagadian kang aka ‘ Kidz’ 23 anyos, gibutyag niini nga tulo ka bulan pa lamang siyang nakig-uban sa walhong grupo apan nakahukom siya pagbalik sa sabakan sa gobyerno kay dili niya masabot ang mga pamaagi sa maong grupo og daw gikapoy na usab siya sa pasalig sa ilang mga lider.
Gisulti usab ni Lt. Col. Patria sa RMN Newsteam nga nalipay siya nga nakahuna-huna nga mosanong kining walhong grupo sa kampanya sa gobyerno.
Giawhag pa niini ang mga kauban nga anaa pa karon sa kabukiran nga mosurender na usab tungod kay gipasalig ni Presidente Rodrigo Duterte nga tagaan og ayuda ug programa ang mga NPA nga mobalik sa gobyerno.
