Bangkay na sang nasapwan ang isa ka bata nga babayi sa sulod sang kampo sa Had. Phoenix, Brgy. Binubuhan, Bago City pasado las 6 kaina sang aga.
Ang biktima isa ka 14-anyos nga bata nga babayi, grade 8 student, kamagulangan nga bata sa 3 ka mag-utod kag residente sang Brgy. Araal, La Carlota City.
Suno sa lolo sang biktima nga si Leoncio, 67 anyos, sa interview sang DYHB nga sadtong January 1, 2020 mga las onse sang aga naglisensya ang iya apo nga makadto sa balay nga didto ginapa-charge ang iya cellphone kag wala na naka-balik.
Ginpahayag ni Leoncio nga pasado las 5 sang hapon nag-abot ang iya bata nga si Ricky, amay sang biktima kag nagsiling nga wala sila naka-kit-anay sang bata ukon buot silingon wala ini nakalab-ot sa balay nga ginapa-charge ang cellphone.
Siling sang lolo nga bangud sini, gilayon nila nga ginpangita ang biktima kon diin ang amay nakalab-ot pa sa La Castellana sa pagpangita sa iya bata.
Kag kaina sang aga, ginpabalo na lamang sila nga may nasapwan nga bangkay sa amo nga lugar kag didto ila ginkadtuan kag gin-confirm nga ini ang bata nga nadula.
Samtang sa interview naman sang DYHB sa amay sang biktima, nagapati ini nga ginhimuslan pa ang iya bata bangud nga ang iya underwear ang nakita na lamang sa luyo sang bangkay kag may pilas pa sa iya palad.
[image: image.png]
