Davao City – Gisulong sa kapulisan ang usa ka balay sa may Prk. 3, Brgy. Langub, Maa, Talomo District ning syudad kagahapong adlawa subay sa nadawat nga report nga adunay mga armadong mga tao nga gisuspetsahang sakop sa New Peoples Army sa maong lugar.
Gisulti ni Davao City Police Office (DCPO) head Senior Supt. Alexander Tagum nga dali siyang nagtukod og Joint Task Group aron mukasa og combat operation batok sa maong grupo nga adunay planong manghasi sa kalinaw sa syudad.
Daling gi-aresto sa mga operatiba ang tagbalay nga gituohang mga NPA members nga si Jimmy Duran Lucob, 26 anyos, construction worker diin nakuha gikan niini ang usa ka granada ug mga subersibong mga dokumentos uban ni Raquelyn Moda nga nakuhaan pod og usa ka homemade caliber 3516.
“Nakuhaan pod sila og mapa nga gihimo nila nga nakabutang didto ang mga target nila nga sulongon dinhi sa Davao City,” sumala ni Tagum.
Apil sa mga narekober sa area ang mga duyan, tactical maps, mga tambal, bag-ong MC 12V Battery apil clamps ug long wire ug tulo ka mga motorsiklo.
“Dili mailhan ang mga tag-iya sa mga single motorcycles based sa atong coordination with LTO,” matud ni Tagum.
Segun ni Tagum nga base sa pamahayag sa mga nadakpang mga suspek sukad pa niadtong adlaw’ng Lunes ang maong grupo nagpondo sa maong lugar.
“Kada gabie nagagawas-gawas ning grupo gamit ang ilang tulo ka motorsiklo para mag conduct og surveillance sa palibot ug sa gina-prepare nilang target,” gibutyag ni Tagum
Nagpadayon ang paggukod sa mga awtoridad sa laing 14 ka mga armadong mga lalaki kinsa niikyas padulong sa kalasangang bahin sa Matina Pangi ning syudad.
RadyoMaN Aimee Guinita
