Report ni: Jennifer Palomo Debaja
Hong Kong ~ Apisar sulit sulit na nga paandam halin sa konsulado sa HK nga egakanselar sang DFA ang pasaporte nga madakpan gina gamit collateral sa lendingan, madamu gihapon ang wala naga kadudla nga mag prenda sang ila pasaporte.
Sa report sang HK Police, 1,400 ka pasaporte ang narekuber sa ginpatigayon nga raid sa OFC Holding Limited kag Cheers Holding Company Limited sa Sheung Wan.
Suno sa isa ka Ilongga nga indi na magpakilala, ginhulam sang iya Tiya ang iya pasaporte sang ngligad nga bulan agud ereplace sa iya passport.
Gawadun na kontani nila ini apang nakibot nalang sila nga gin raid na gali ang opisina sang lendingan kag dimalas nga nalakip ang iya pasaporte.
Ginpakamalaut naman sang konsulado ang natabu kag pagkadismaya sa padayun nga prendahanay sang pasaporte. Mapag-on nga gina panindugan sang mga opisyal sa konsulado nga indi pagpahanugutan nga magrenew sang pasaporte sa Hong Kong ang sin-o man nga nagaprenda sini.
Paga isyuhan lamang sang one-way nga travel document ang mga ini agud maka apply sang bag-o nga dokumento sa Department of Foreign Affairs’ sa Manila.
“Pawning passports is a violation of the Philippine Passport Act. In fact, a Philippine passport reportedly held as guarantee or collateral for loans or debts is automatically cancelled upon notice by the passport holder that the said document was lost,” pahayag ni Consul General Antonio A. Morales.
Sa tuman kadamo sang nakumpiskar nga pasaporte, naga ekspektar na ang konsulado nga magadagsa sa ila opisina ang maga apela sang bulig para sa ila dokumento.
