Davao City – Gidala na sa Southern Philippines Medical Center (SPMC) ang 15 ka mga vendors gikan sa Agdao Public Market alang sa swab test kinsa gisuspetsahan nga dunay COVID-19 human nagpositibo sa gipailawom nga Rapid Diagnostic Test (RDT).
Sa interview sa DXDC RMN Davao kang Pedro Arthur Junsay, tigpamaba sa Brgy. Agdao Proper, ila pang gipaabot ang resulta sa swab test.
Sumala ni Junsay nga usa ka libo na ka mga vendors ug laborers ang napailawom sa RDT sulod sa duha ka adlaw human gisugdan niadtong Lunes (May 25, 2020) hangtod kagahapong adlawa, Martes (May 26, 2020).
Subling nagpahinumdom si Junsay ngadto sa vendors nga kanunay motuman sa mga precautionary measures sama sa paglimpyo sa lawas ug paghugas sa mga kamot.
“Kinahanglan gyod ang pagmintinar sa social distancing, pagsuot og facemask ug paghinlo sa atoang panglawas ug paghugas sa mga kamot gamit ang mga disinfectant ug kanunay gyod nato tumanon. Labaw sa tanan mag-ampo gyod ta sa Ginoo, ang Ginoo ra gyod ang labaw makatabang sa atoa,” saysay ni Junsay.
Padayon ang paglusad og rapid test sa mga vendors ug trabahante nasangpit nga palengke hangtod karong adlawng Sabado (Mayo 30, 2020).
RadyoMaN Don Pulayao
