Ginpasarado sang Department of Environment and Natural Resources (DENR) 12 paagi sa pag-isyu sang closure orders ang 17 ka mga structures/business establishments sa General Santos City kag Polomolok, South Cotabato nga nagaoperate sa forestlands ukon lasang.
Suno kay Community Environment and Natural Resources Officer (CENRO) GenSan Ma. Elvira V. Lumayag nga ang pagpapanaug sang closure orders ang base sa Memorandum nga gin-isyu ni Regional Executive Director, Atty. Felix S. Alicer base sa Section 20 kag Section 78 sang Presidential Decree No. 705 ukon ang Revised Forestry Code of the Philippines.
Pahayag ni Lumayag nga ang mga nagapanag-iya sang nasambit nga mga establishemento ang napaslawan nga magpresentar sang nagakaigo nga dokumento nga nagasuporta sa ila nga operasyon sa nasambit nga lugar.
Gin-isyu ang “Closure Orders matapos ang ginhimo nga inspeksyon kag orientation sa mga balaud angot sa paggamit sang forestland.
Dugang pa ni Lumayag nga ang ila nga opisina ang nagpatigayon sang inventory sang mga establishemento nga nagaoperate sa forestlands nga malakip sa Base Map kag posible may-yata pa sang batch sang mga establishemento ang ila nga pagasarad-an sa nagapadayon nga inspeksyon.
Samtang ginhatagan punto ni DENR-XII Regional Executive Director (RED) Atty. Felix S. Alicer nga importante ang development, apang kinahanglan man ang environmental protection paagi sa tama nga paggamit.
Ginsiguro man ni Alicer nga suportahan sang ahensya ang nasambit nga mga establishemento sa tion nga mangin legal ukon lehitimo na ang ila nga operasyon paagi sa pagcomply sang nagakaigo nga mga dokumento.
