Gi-turn over na sa Provincial Jail sa Mambajao Municipal Police Station sa Camiguin ang 18 anyos nga adunay kasong attempted rape.
Kini ang gibutyag ni Police Staff Sergeant Mayla Tagorda- sa Womens and Children Protection Desk kon WCPD sa Mambajao Camiguin.
Matud ni Staff Sergeant Tagorda nga managsilingan ang dose anyos nga biktima ug ang suspek.
Dugang pa ni Staff Sergeant Tagorda nga sinaligan sa inahan sa biktima ang suspek tungod kay didto na kini magkan-anan sa balay sa biktima kay walay ginikanan niini ug nagpuyo lamang sa iyang lola.
Nasayran nga nahitabo ang sulay nga paglugos sa suspek niadtong Mayo ning tuiga diin misulod kini sa kwarto sa biktima alas kwatro sa kadlawon ug niagi sa bintana nga bahin.
Gani, suot lamang niini ang iyang brief ug t-shirt ug gihawid hawiran ang pribadong bahin sa lawas sa biktima.
Samtang giklaro ni Police Staff Sergeant Tagorda nga hubog ang suspek niadtong tungora.
Matud ni Staff Sergeant Tagorda nga atol sa maong adlaw nakamata ang dose anyos nga biktima busa nakasinggit nga nagresulta sa pagmata sa ginikanan niini.
Nasayran nga bisan og misinggit na ang biktima, gikumot pa sa suspek ang baba niini.
Nasayran usab nga gidakop ang suspek pinaagi sa warrant of arrest.
