Alabel, Sarangani Province—mitahan sa usa ka Barangay Official sa Barangay Alegria, Alabel Sarangani Province ang usa ka 18 anyos nga nag pailang miyembro sa NPA.
Sa interview sa Rmn Gensan kang Police Chief Inspector Benjie Anchita, Hepe sa Alabel PNP nga giturn-over ni Barangay Alegria Kagawad Cesar Lim ang 18 anyos nga si Jojie Boy Lebucan, nga taga Prk. 1, sa samang Barangay human nga misurender kini kaniya alas 5:00 ang takna sa kabuntagon, Martes, june 27, 2017.
Saysay sa 18 anyos nga duha palang sya ka bulan nga miuban sa kalihukan sa NPA ug sya nabasi sa Front 75. Siya mitahan sa sabakan sa gobyerno tungod sa kapakyasan sa mga nahisgutan nga mahatag kaniya ang saad nga siya hatagan ug asawa kung asa ang NPA pa ang mugasto sa pagpakasal.
Dili na usab niya maagwanta ang tumang kakapoy ug kagutom sa kabukiran mao nga sya midesisyon nga muuli sa ilang balay ug musurender nalang sa otoridad.
Sumala ni PCI Anchita nga ila pang imbistigahan kung tinuod ba gyud nga miyembro sa NPA ang 18 anyos aron masiguro nga wa kini magpakarong-ingnon aron lang nga makakuhag binipisyo gikan sa gobyerno.
Gidugang pa sa opisyal nga ilang i-background check ug sila makig-alayon ngadto sa militar aron sila tabangan sa pag validate kung miyembro ba gyud sa walhong pundok si Lebucan.
