Gibaha kagahapong adlawa ang desi otso ka lungsod sa Misamis Oriental gumikan ni bagyong Vinta.
Matud ni Fernando Dy Jr., ang hepe sa P-D-R-R-M-D nga tres mil kapin ka mga pamilya kon dies mil kapin ka mga individual ang mibakwit sa nagkalain laing evacuation centers, human nga gibaha ang mga kabalayan sa lalawigan.
Padayon pa usab ang ilang pagkuha og assessment report gikan sa mga opisyal sa kalungsoran, aron ilang masayran ang kadaot nga mugna sa maong bagyo.
Sa karon dili pa nila masulti kung ipailalom ba sa state of calamity ang lalawigan ilabina na walay natalang kadaot sa imprastraktura, atol sa maong bagyo.
Hinuon naglakip sa mga gibahaan ang lungsod sa Kinoguitan, Binuangan,Talisayan, Balingoan, Lagonglong, Alubijid, Balingasag, Salay, Jasaan, Villanueva, Claveria, Naawan, Lugait, Tagoloan, Opol, El Salvador City, Gingoog City ug Manticao.
Samtang, gibaha usab ang 23 ka mga barangay ning dakbayan sa Cagayan de Oro kagahapong adlawa.
Gani ang ubang dapit miabot na sa atop sa ilang mga balay ang kataas sa tubig-baha.
Tungod niini, mismo si Mayor Oscar Moreno ang mimando sa mga residente nga mobakwit na lamang paingon sa mga designated evacuation centers kagahapong adlawa.
By; Radyoman Aiza Enloran and Ellah Baculio
