Naipailawom ang 18 ka mga Mayor sa probinsya sa Bukidnon sa self-quarantine human nga nakigtagbo ni Senador Migz Zubiri atol sa League of Municipalities of the Philippines – LMP Bukidnon Chapter meeting sa kauluhan niadtong Marso 10, 2020.
Kini ang gipamahayag ni Cabanglasan Mayor Renante Inocando, nga mao usab ang Presidente sa LMP Bukidnon Chapter atol sa interview sa RMN DXMB Malaybalay karong buntag.
Nasayran, nga wala naka-uban ang Mayor sa lungsod sa Impasug-ong sa mao nga meeting samtang niuna ug uli tungod sa kakulian sa iyang lungsod ang Mayor sa Kitaotao.
Maong sa 20 ka mga lungsod sa Bukidnon, 18 ka Mayor lamang ang present sa mao nga meeting kauban si Senator Zubiri.
Dugang pa ni Mayor Inocando, nga ang uban sa ilaha nagpailawom na sa self-quarantine pag-abot gikan sa Manila, human nga gitambagan sa MHO nga mupailawom sa Quarantine, apan ang uban usab, apil siya, ayha pa siya nag self-quarantine tungod kay wala siya nahatagan ug advice.
Nangayo usab ug despensa ang Mayor sa mga tawo nga iyang natagbo, dungan sa pag ingon nga walay gusto sa mao nga panghitabo.
Giklaro usab sa Mayor nga wala sila nakasinati ug sintomas sa COVID-19.
Nakiglambigit na usab ang NEDA-10 ngadto kanila aron ipailawom sila sa testing.
Mahinumduman nga gi-kumpirma ni Senate Majority leader Juan Miguel Zubiri kagabie nga nag-positibo sya sa COVID-19.
Si Senador Zubiri ang pinaka-unang taas nga opisyal sa gobyerno nga na-infect sa pandemic virus.
