Padayon nga ginahangkat sang Department of Trade and Industry ukon DTI 12 ang mga business establishments sa rehiyon nga magpatisipar sa Safety Seal Certification Program sang ahensya.
Sa subong nagalab-ot na sa 19 ka mga businesss establishments sa rehiyon dose sa diin duha na dire sa Koronadal ang nahatagan na sang DTI-12 sang Safety Seal Certification bilang pagkilala sa ila pagsunod sa gintalana nga minimum health standards agud protektahan ang mga bumalakal batok sa paandam sang COVID-19.
Ginpahayag ni DTI-12 Regional Director Jude Constantine S. Jaugan nga ang Safety Seal Certification ang isa ka inisyatibo nga may katuyuan nga hatagan sang pagkilala ang mga establisyemento nga padayon nga nagasunod sa minimum health standards subong man ang paggamit sang contact tracing system.
Dugang pa ni Director Jaugan nga ang aplikasyon sang mga business establishments sa Safety Seal Certification ang libre kag makahatag kumpyansa sa mga bumalakal nga pilion ang establisyemento nga nagasunod sa health standards.
Samtang padayon naman ang pagpatigayon sang DTI 12 sang inspeksyon sa bug-os nga rehiyon para sa mga business establishment nga luyag makaangkon sang Safety Seal Certification.
