Ginkakasan sang supervisory power sa ila nga local police ang duha ka mga alkalde sa South Cotabato tungod suno pa sa ginaaligar padayon ang mga ini nga imbolbado sa illegal drug trade/activity base sa padayon nga validation sang mga intelligence agencies.
Base sa Napolcom resolution ginkakasan sang supervisory power sa PNP sanday Banga Mayor Albert Palencia kag Sto Niño Mayor Pablo Matinong Jr.
Sa resolution no. 2017-573 sang NAPOLCOM sang Oktubre 30, 2017, nga pirmado ni OIC Department of Interior and Local Government kag Napolcom Chairman Catalino Cuy.
Samtang lakip man sa nagpirma sa nasambit nga resolution sanday Napolcom Vice Chairman and Executive Officer Rogelio Casurao kag Commissioners Philippine National Police Chief Director General Ronald dela Rosa, Felizardo Serapio Jr., Job Mangete, kag Zenonida Brosas
May-angot sini, ginkumpirmar ni Police Sr. Supt. Franklin Alvero, Police Provincial Director sang South Cotabato PPO nga naserbi na nila kahapon nga adlaw order kay Mayor Pablo Matinong kag sa mga chief of police sang Sto. Niño kag Banga , samtang kay Mayor Albert Palencia ang wala pa tungod yara suno pa ini sa Metro Manila.
Wala naman suno pa kay Alvero sang epekto sa ila ang pagkakas sang police power sa duha ka mga alkalde sa South Cotabato.
Ginpahayag man ni Pd Alvero nga kadungan sa pagserbi nila sang kamanduan kay Mayor Matinong ginhingyo niya nga ipadayon lang ang suporta sa Pnp.
