Anggulong arson sa sunog sa Langihan wala gisalikway sa BFP
Naugdaw ang duha ka panimalay ang gilamoy sa kalayo bandang alas 11:28 ang takna kagabie diha sa Langihan Road, Purok 4 brgy. San Ignacio ning syudad sa Butuan.
Ang maong panimalay gipanag-iyahan ni Jessica Perez ug Caryll Mosgi diin pulos naabo ug walay naluwas nga mga butang mga biktima.
Gibana-bana’ng mokabat sa P150,000 ang inisyal nga damyos sa sunog basi sa pagbana-bana sa Bureau of Fire Protection (BFP) nga nag-imbistiga sa maong insidenti.
Niabot sa unang alarma ang sunog kung asa mokabat sa 6 ka mga fire trucks ang mirepondi sa sunog.
Padayon pa’ng giimbistigahan sa BFP kung unsay hinungdan sa sunog apan gipasibaw ni Jeffrey Perez, ang anak sa tag-iya sa panimalay nga posibleng gituyu ang pagsunog.
May nakitang tawo nga midagan sa gawas matud pa human misilaob ang kalayo ug nagtoo sila nga gisabligan ug gasolina ang likod nga bahin sa panimalay kung asa didto nagsugod ang kalayo.
Dugay na sumala pa nga nakamatikod sila’ng adunay tawo nga maghapa-hapa sa ilang panimalay.
Dugtong sa maong balita
Nakuha na sa Bureau of Fire Protection (BFP) ang panig sa mga biktimang nasunogan sa Langihan Road Brgy. San Ignacio ning syudad sa Butuan kagabie.
Sigun ni SFO1 Ted Ganapin, ang fire investigator sa BFP Butuan nga gidudahan sa pamilya nga arson kon gituyu sa pagsunog ang ilang panimalay maong gipaubos karon sa makuting imbistigasayon sa ilang buhatan.
Aminado si SFO1 Ganapin nga wala pa silay igung basehan ug ebidensya aron pamatud-an ang akusasyon sa pamilyang nasunogan.
Gihulat pa sa BFP kung adunay mobarug nga saksi sa nga mopamatuod nga tinuyu ang sunog aron mas mapadali ang ilang imbistigasyon.
Si SFO1 Ted Ganapin, ang fire investigator sa BFP Butuan sa iyang pamahayag.
Kung dili kontento ang pamilyang nasunogan sa imbisitgasyon sa BFP Butuan mahimung modangop sila sa BFP Agusan del Norte alang sa dugang pagkalap ug ebidensya.
