BACOLOD CITY – Ginpa-blotter sang duha ka mga barangay clerk ang duha ka mga barangay kagawad sang Brgy. 30 sa reklamo nga unjust vexation.
Sanday Roselyn Recaido, 28 anyos ang edad, pumuluyo sang Purok Mabinuligon kag Melissa Rivera, 26 anyos sang Purok Paglaum tanan sang Brgy. 30 ang nagpadulong sa Police Station 6 agud ipablotter ang duha ka mga barangay kagawad.
Ini sila amo sanday sanday Brgy. Kagawad Elvira Arcobillas, legal ang edad kag Ma. Leah Polidario kon diin suno sa mga complainant, ini sila ang ginhambalan sang indi maayo nga mga tinaga.
Suno sa mga tagreklamo nga pasado las 9 kahapon sang aga sa sulod mismo sang barangay hall durante nga nagasugilanon sila upod sa mga kagawad, hinali na lamang nga naghambal si Arcobillas nga nakabati siya sang istorya nga pahalinon ni kapitan ang duha bangud nga nagpangawat ini sila.
Sang nakabati naman si Polidario ini siya ang nagtugda nga nakabati man siya sang kaangay nga istorya.
Bangud sini, naglain ang buot kag naakig sanday Recaido kag Rivera bangud nahuy-an sila./ Contributed photo/not the actual photo
