Mukabat sa 2.2 milyones pesos ang kantidad sa mga starter kits isip livelihood ang gitunol sa Department of Labor and Employment kon DOLE Bukidnon kagahapong adlawa atol sa pagsaulog sa Independence day.
Sa interview sa RMN ngadto kang DOLE Bukidnon Provincial Director Raul Valmores, gibutyag niini nga ang nahatagan sa livelihood program kadtong mga ginikanan sa mga bata nga na apil sa profiling sa child labor.
Nasayran nga naghimo ug pag-profile ang DOLE sa mga child labor aron ilang kining mahatagan ug pagtagad.
Matud ni Valmores nga apil sa mga livelihood nga ilang gia-pod-apod ang sari sari store, pagbuhi ug mga baboy, ug uban pang ginagmay nga negosyo.
Tumong niini aron mapatungha na ang mga kabataan nga nakaundang tungod kay gipatrabaho na gumikan sa kawad-on.
Ila usab nga gidasig ang mga kabataan nga mubalik sa pagtoon aron makatabang sa ilang pamilya ug paglambo sa ekonomiya sa nasud.
Samtang dungan sa maong aktibidad kagahapon, gisaulog usab ang labor day alang sa mga informal sector.
Sigun ni Director Valmores nga kini subay sa department order ni Sec. Silvestre Bello III nga saulugon ang labor day alang sa mga namaligya sa kadalan, market vendors ug mga trisekad drivers.
