Davao City – Patay ang duha ka tao samtang anaa sa unom (6) ang angol sa nahitabong disgrasya sa National Highway, Barangay Magsaysay, Nabunturan, Davao de Oro alas-10:40 kagahapon sa buntag (September 15, 2021) tali sa usa ka fuel tanker ug harvester tractor.
Sa interbyu sa DXDC RMN Davao kang Police Major Jesser Vagilidad, hepe sa Nabunturan PNP, gibutyag niini nga as of 5PM kagahapon dead on arrival sa Davao de Oro Provincial Hospital sa Montevista ang usa ka Edwin Maramba, hamtong samtang gidala usab sa ospital ang ubang injured nga sakay sa tractor.
Saysay ni Vagilidad nga pa Davao del Norte ang direksyon sa duha ka sakyanan sa dihang nawad-on control ang driver sa tanker hinungdan nga mibangga kini likod sa tractor ug mideritso sa usa ka tindahan.
“Initially, kadtong tanker pagkahuman atong nag-bump siya didto sa may Kobota (tractor), siguro pud na-out of control napud siya, nidiretso siya didto sa kan-anan pero fortunately, wala poy nabanggaan or nadamay (sa kan-anan),” saysay sa pulis.
Sa interbyu usab sa DXDC RMN Davao kang Diego Geralde, 59-anyos, taga Sta. Cruz, Davao del Sur, ang driver sa tanker, aminado kini nga nawad-an kini og kontrol sa manubela human nga wala mipaak ang brake sa iyang gimanehong sakyanan.
“Naggahi ang brake, wala na kaayo siya nipaak ba. Naka-90 degree na gud ang akoang manubela. Paliko na ba ka paliko kay pagtan-aw nako duol na man kaayo. Pag-impact gyud nipiyong na ko. Mao ‘tong paglagpot sa kadtong gibanggaan nako, nangalagpot ‘tong sakay,” saysay ni Geralde.
Gibutyag usab ni Geralde nga matud sa kabanay sa biktima namatay usab sa ospital ang usa pa ka sakay sa tractor rason nga nangayo kini og pasaylo ug pahasubo sa pamilya sa mga biktima diin wala niini gituyo ang panghitabo.
Sa pagkakaron, naka-detain sa Nabunturan PNP ang driver sa tanker ug ginapaabot ang mamahimong ‘settlement’ tali sa pamilya sa biktima ug kung muduso ba kini og kaso batok kaniya.
RadyoMaN Kirby Manzon
