Davao City – Duha patay sa managlahing insidenteng pagpamusil sa mga wala pa mailhing mamuno sa Davao del Norte karong lamang semanaha.
Niadtong Huwebes samtang on duty ang usa ka sekyu gipaulanan kinig bala sa usa suspek sa wala pa matino nga rason sa may 7 eleven building atubangan sa Davao Regional Hospital sa Brgy. Apokon Tagum City, Davao del Norte pasado alas 2 sa kaadlawon.
Ang biktima giila nga si Jordan Bragado, taga Mawab Compostela Valley Province ug sakop sa Black Fighter Security Agency.
Gisulayan pa og dala sa balay tambalanan ang gipusil nga si Bragado apan gideklara na kining dead on arrival sa mga doktor.
Sa susamang adlaw gipusil patay usab ang usa ka 33 anyos nga lalaki samtang sakay sa iyang motorsiklo sa may Purok 3 Brgy Little Panay, Panabo City.
Ang biktima giila sa Panabo police nga si Ariel Maquiran nga taga Prk. 4 Brgy Maduao, Panabo City.
Gidala sa Rivera Funeral Homes sa Licanan Panabo City ang patayng lawas sa biktima ug gipailawom kini sa post mortem examination.
Sa kasamtangan mihimo karon og hot pursuit operation sa Davao del Norte Police Provincial Office batok sa mga suspek aron masolbad ang maong mga krimen ug mahatagan og hustisya ang mga biktima.
RadyoMaN Aimee Guinita
