Wala pag-intiendihanay tungod sa sobra nga kahulugbon rason sang nagluntad nga magseparar nga insidente sang pagpanglabo sa banwa sang Tampakan, kagab-i Marso 23, 2021.
Alas 7:30 kagab-i nagreport sa Tampakan MPS ang biktima nga si Bobby Legarde, 49 -anyos, may-asawa, laborer kag residente sang Purok San Antonio, Brgy. San Roque, Koronadal City nga suno pa ginlabo ni Dominador Niñez Barrera, 62-anyos, mekaniko kag residente sang Purok Paghiusa, Brgy. Poblacion, Tampakan, South Cotabato gamit ang bolo.
Nakaangkon sang pilas sa iya likod nga parte sang ulo ang biktima nga gilayon man nga ginpaidalom sa medikasyon.
Samtang, alas 10:00 kagab-i nagreport man sa Tampakan MPS ang biktima nga si Daniel Malayon Sen , 34 –anyos, residente sang Purok Maligaya, Brgy. Kipalbig, Tampakan, South Cotabato nga suno pa ginlabo ni Jun Tambi, 34 -anyos, farm laborer kag residente sang Purok Maligaya, Brgy. Kipalbig, Tampakan gamit ang bolo.
Nakaangkon ang biktima sang labo sa wala nga parte sang iya nga kamot.
Naaresto naman ang mga suspek sa nasambit nga insidente kag ang bolo sang mga ini nga gingamit.
