Davao City – Nagpadayon ang manhunt operation sa Davao City Police Office (DCPO) batok sa duha ka mga suspetsadong mitulis-patay sa Chinese national.
Gibutyag ni DCPO City Director Police Col. Kirby John Kraft, giadtoan na sa kapolisan ang mga lugar nga posebling gitagoan sa mag-igagaw nga sila Amrix Macarimbang ug Hanafiy Macarimbang, trabahante sa gipatay nga biktimang si Xu Li Zhen sulod sa WJF warehouse niadtong Agosto 25, 2020.
“ Ongoing pa ang ating manhunt, hinahabol pa talaga natin ang mga suspek (sa pagpatay sa Chinese businesswoman),” matud ni Kraft.
Gibutyag ni Kraft nga dakong hagit kanila ang lokasyon sa posebling gitagoan sa mga suspek tungod sa kadelikadong seguridad tungod sa presensya sa mga militant armed groups. Nagpatabang usab ang kapolisan sa militar sa maong lugar. Adunay ganti kun reward nga P30,000 sa makatudlo o makahatag og impormasyon sa matag suspek.
Alas 9:00 sa gabii niadtong Agosto 25, ning tuiga napalgang patay nga daghan og dinunggaban ug narekober sa crime scene ang nagkadugo nga improvised nga gunting ug bato tapad sa lawas sa biktima.
RadyoMaN Aimee Guinita
