General Santos City–Patay ang usa ka Jury Magbanua, hamtung, nga nanimuyo sa Barangay Lagao samtang samdan usab ang kauban niini nga si Denmark Bolivar, 32 anyos, ug nanimuyo sa Barangay San Isidro ning syudad human nga misukol ang mga nasangpit sa gipahigayong operasyon sa kapulisan batok sa mga nahisgutan.
Sumala pa ni Police Major Alex Lanestosa, Hepe sa Police Station 4, nga ang mga suspect ang gitudlong responsible nga nang holdup sa usa ka maestra samtang nag-lakaw kini sa sadan nga sakop sa Toledo Subdivision, Brgy City Heights alas 7:00 ang takna sa gabie kung asa nakuha sa suspect ang cellphone sa nahisgutan.
Gilayon man usab nga nakareport ang biktima sa kapulisan diin paspas usab nga nagpahigayon ug manhunt operation ang mga intel operatives sa maong estasyon nga anaa lang usab duol sa lugar.
Gikan sa toledo gikukod sa kapulisan ang mga suspect ug pag-abot sa Maria Teresa Street, Barangay San Isidro na-abtan ang mga suspect ug gipahunong, apan inay nga muhunong mipasirit man hinuon kini ug padagan sa ilang gisakyan dungan sa pagbunlot ug armas sa backrider nga si Magbanua dayong pabuto sa mga miresponde nga pulis hinungdan gibaslan ug pabuto sa kapulisan nga miresulta sa pag ka-igo sa duruha.
Narecover sa posisyon sa mga suspect ang cal. 38 nga revolver nga dunay duha ka mga basiyo sa bala, cal. 45 nga armas nga dunay 7 ka mga buhing bala ug ang bag nga dunay unod nga cellphone sa biktima.
Sa kasamtangan nagpabilin paman sa ospital ang suspect nga si Bolivar ug hugot nga ginamonitor sa kapulisan samtang gina-imbistigahan na karon kung kinsa pa ang mga kauban sa duruha.
Sumala pa ni Major Lanestosa nga sa ilahang pag-interview sa suspect nga si Bolivar, miangkon kini nga sila gayud ang responsible sa mga pag pangholdup sa area sa Police Station 4 lakip na ang usa ka gasolinahan.
Samtang ang ilaha matud pang makuha nga mga cellphone ang ginabaligya sa ilang mga kauban.
