General Santos City—samdan nga nahidangat sa Dr. Jorge Royeca Hospital ang usa ka 20 anyos nga lalaki human nga gidunggab sa grupo sa mga batan-on sa may Makar Highway, Barangay Labangal Gensan.
Ang biktima giilang si Elvert Canlas, 20, residenti sa Saway, Labangal Gensan. Alas 12:45 ang takna kaganinang kaadlawon, samtang nagbaktas ang biktima uban sa iyang uyab, kalit lang silang gibato sa grupo sa mga batan-on.
Wala pa makontento ang mga suspek ilang gigukod a ng mag-uyab ug dihang naabtan ang biktima gidunggab gilayon igo sa iyang abaga.
Paspas nga misibat ang mga suspek samtang ang biktima, gidala gilayon sa iyang hinigugma sa ospital.
Sa inisyal nga pagsuta sa kapulisan, nasayran nga ang mga suspek sa krimen mao silang si Alias Jayjay, David, Bakat ug Alias Macky. Sa karon ginasuta pa sa kapulisan ang motibo sa pagpanunggab ug gipangita pa usab ang mga suspetsado.
