Gibana-banang duha ka libong raliyesta ang nagkatigom kagahapong adlawa ning syudad sa Cagayan de Oro nga gilangkuban sa duha ka grupo.
Usa niini ang gikan sa progresibong grupo nga supak sa gipatumang martial law sa Mindanao ug extension niini.
Gisugdan sa grupo ang ilang martsa sa Misamis Oriental Provincial Capitol paingon sa Camp Evangelista, Cagayan de Oro City Hall ug Divisoria.
Samtang ang pro-government group nagrally sa Divisoria area kung asa gibutyag niini nga pabor sila sa extension sa Martial law.
Kagahapon sa kadlawon, naglisod sa pagsulod ang mga miembro sa Progresibong grupo ning syudad kay gikan sa Bukidnon, pito ka higayon silang naharang sa gihimong check point sa kapulisan ug militar.
Gitunong sa mga grupo ang ilang rally sa kasaulogan sa ika 70 ka tuig nga International Human Rights Day.
