Davao City – Padayong magmonitor ang City Health Office (CHO) sa mga tawong nibiyahe gikan sa lugar nga didto nagsumikad ang 2019 novel Coronavirus (2019-nCoV) aron kapugngan nga moabot kini sa syudad human gikumpirma sa Department of Health (DOH) nga aduna nay usa ka kaso sa maong balatian sa nasud.
Sumala ni Dr.Gene Gulanes, Acting City Health Officer, giawhag nila karon ang mga gikan nagbiyahe nga moabot sa syudad nga boluntaryong mopailawom sa eksaminasyon ilabi na kadtong adunay mga simptomas.
Giklaro usab ni Gulanes nga close monitoring ang ilang gihimo karon sa mga mosulod sa dakbayan ug kung mamatikdan nga adunay mga timailhan, ipailawom gilayon sila sa quarantine sa publiko ug pribadong tambalanan.
Panawagan usab ni Gulanes ngadto sa katawhan nga dili mokumpyansa, kanunay magbantay sa palibot ug tumanon ang mga angayang himoon nga gimando sa DOH aron makalikay sa maong balatian.
RadyoMan Bernard Pantallon
