Gipahigayon sa Technical Education and Skills Development Authority o TESDA ang 2019 Regional Skills Competition dinhi sa Cagayan de Oro isip pag-ila sa mga skilled workers sa Northern Mindanao ug mahatagan sa oportunidad nga makasalmot sa National ug International arena.
Sa iyang mensahe, gibutyag ni TESDA Lanao del Norte Provincial Director El Cid Castillo nga ang maong kompetisyon makatabang sa pagpahibalo sa publiko kon unsa ka maayo ang mga tunghaan ug youth trainees.
Mikabat sa 26 ang misalmot sa duha ka adlaw nga kompetisyon ug 25 ka mga experts gikan sa 25 ka mga Technical Vocational Institutions sa bisan asang parte dinhi sa rehiyon.
Samtang, nakasentro ang kompetisyon sa siyam ka propisyon nga gilangkoban sa Cooking, Restaurant Services, Mechatronics, Electronics, Automotive Technology, IT Network Systems Administration, Welding, Electrical Installation ug Refrigeration and Air Conditioning.
Ang mananaog niini mahimong mosalmot sa zonal eliminations ug mo-compete sa National finals ug ang national winners maoy mo-representar sa nasud alang sa Association of Southeast Asian Nations World Skills Competition nga himoon sa Singapore sunod tuig.
