Mukabat sa 206 ka bag-ong kaso sa COVID-19 natala sa Bukidnon kagahapong adlawa lang (May 26, 2021).
Kini ang pinaka-daghan nga natala sulod lamang sa usa ka adlaw.
Sa interview sa RMN DXMB Malaybalay ngadto kang Provincial Health Officer Dr. Gary Guido C. Tabios Jr., kinsa mao ang Vice-Chairman sa Provincial COVID19 Inter-Agency Task Force (IATF), gi-awhag niini ang tanang katawhan nga mosunod og mo-kooperar sa direktiba sa Department of Health (DOH) aron makunhod ang kaso sa COVID-19.
Gipasabot usab ni Dr. Guido nga imposibleng mokunhod ang kaso kung walay partisipasyon gikan sa katawhan, busa, iyang gipahimangnoan ang tanan nga magbaton ug disiplina sa kaugalingon, likayan ang paglakaw-lakaw kung dili importante, magsunod sa minimum public health protocols sama insakto nga pagsuot ug facemask/face shield, paghugas sa kamot og pagdistansya gikan sa ubang tawo.
Matud niya nga bisan ug adunay mga makarekober kada adlaw apan padayon kini nga musaka tungod kay nadugangan ang kaso kada adlaw.
Gipahayag ni Dr. Tabios, nga tungod sa nagkataas nga kaso sa COVID-19 sa lalawigan, miresulta kini sa pagkapuno sa Bukidnon Provincial Medical Center (BPMC) tungod kay mao lamang kini ang nag-inusarang hospital sa tibuok probinsya nga gadawat ug mga pasyente nga natakbuyan sa maong virus. Dugang niya nga ang si kinsa mang magpositibo sa virus nga kinahanglan e-admit, magpaabot pa nga dunay mabakanteng covid bed aron ma-accomodate.
Aduna matud pay tsansa nga mamatay ang pasyente kung dili maka-survive.
–30–
