Mikabat sa 24 milyon pesos nga balor sa shabu lakip na mga eksplosibo ug nagkadaiyang klase sa armas gikan sa pamilyang Luansing sa San Roque, Ozamiz City, Misamis Occidental ang nakumpiska sa kapolisan sa Ozamiz City Police Station.
Kini dason sa gisilbing kinse ka mga search warrants gikan sa korte ni Ozamiz City Police Office commander Chief Insp. Jovie Espenido batok sa lima ka pamilyang Luansing sa maong dapit.
Matud ni Espenido nga unang gi-raid ang balay ni Boy Luansing kung asa nakuha ang kapin sa usa ka kilong shabu, mga eskplosibo ug armas.
Nakuha usab gikan sa balay ni Rufina Luansing, ang bag-ong usa ka kilong shabu, explosives ug nagkalain laing klase sa armas.
Gawas niini, nakita usab sa raiding team ang shabu, armas ug mga eksplosibo sa usa ka balay nga gipanag-iyahan ni Tinay Luansing, samtang nasikop silang Ruben ug Analyn Luansing human nakuhaan sa 300 grams sa shabu, explosives ug kalibre .25 nga armas.
