General Santos City—Angol ang usa ka Teddy Boy Montero, 25, residenti sa Bulaong Extension, Barangay Labangal, Gensan human kining gipusil sa wala pa mailhing suspetsado alas 6:30 ang takna sa gabie adlawng Domingo, Setyembre 9, 2018.
Sa inisyal nga imbistigasyon sa kapulisan nasuta nga nagbaktas lang ang biktima didto mismo sa ilang lugar sa may dike nga bahin padulong unta sa balay sa iyang igsuon dihang kalit kining gipusil sa wala mailhing mga suspetsadong nakabonet.
Nakaangkon ug samad sa tiyan nga bahin ang biktima kansa daling gidala sa iyang mga kabanay sa ospital, samtang mga suspek paspas nga misibat padulong sa wala masayring lugar.
Sumala sa live in partner sa biktima nga si Charline, ayha nahitabo ang pagpamusil dunay nahitabong riot tali sa mga batan-on sa lugar diin iyang gituohang naalaan lang ang iyang kapuyo.
Sa karon nagpadayon pa ang imbistigasyon sa maong kaso ug ginaila pa ang mga suspetsado.
