Mikabat sa 251 ang kinatibuk-ang ihap sa mga aplikante sa pagka-sundalo ang nanumpa niadtong Hunyo 4 ning tuiga sa 4th Infantry“Diamond” Division, Philippine Army, Camp Evangelista, Patag ning siyudad.
Sulod sa maong ihap, 236 niini mga lalake ug kinse ka mga babaye kinsa gikan sa Region 9, 10, 11 ug CARAGA.
Ang maong mga aplikante mipailawom sa comprehensive ug competitive selection process nga gilangkoban sa written, physical and medical exams, trade test, board interviews ug naka-kompleto sa basic clearance gikan sa mga ahensya sa gobyerno.
Nasayran nga dunay 558 ka mga aplikante apan 251 lang ang mipasar sa mga exam. Ang 251 ka mga candidate Soldiers ipaubos sa unom ka bulan nga intensive military training.
Samtang, Gibutyag ni Col Philip Lapinid, Assistant Division Commander for Reservist and Retirees Affairs nga ang Oath Taking ceremony nagpaila nga andam na ang mga aplikante alang sa kalisod nga ilang agian isip mga sundalo.
Gipasabot pa niini nga oras nga mosulod na sa military service, lahi na ang panghunahuna dili sama sa ordinaryong sibilyan.
Sa laing bahin, Nanghinaot si Major General Franco Nemesio M Gacal, Commander sa 4th ID nga seryusohon sa mga aplikante ang ilang sunod nga mga training aron makatabang sa kampanya sa pagsumpo sa kagubot sa Region 10 ug CARAGA.
