Giila ni Mayor Oscar Moreno nga usa ka “Break Through and Milestone” ang 251 million pesos Investment sa Metro Pacific Investment Corporation aron pag-supply sa abondang tubig sa 2nd district sa Cagayan de Oro.
Kini ang gibutyag ni Moreno atol sa Ground Breaking kagahapon sa buntyag sa Sitio Tipolohon, Barangay Indahag ning syudad sa Cagayan de Oro alang sa 251 million pesos nga water facilties nga iya sa Metro Pacific.
Ang Metro Pacific mag-instolar sa siyam ka kilometro nga tubo sa tubig nga dunay gidak-on nga 600 millimeter kon tunga sa metros ang iyang diameter.
Kini nga tubo ikutay sa Metro Pacific gikan sa Taguanao Bridge subay sa kilid sa South Diversion Road padulong sa higanting reservoir sa Cagayan de Oro Water District sa Barangay Camaman-an nga dunay water capacity nga 5,300 Cubic meter kon kapin sa 20 million ka litros.
Ang tubig nga mo-agi sa maong mga pipe line ngadto sa Takni sa COWD gikan kini sa Water Treatment Plant sa Cagayan Bulk Water Inc ang ba-ong water company nga gipanag-iya sa Rio Verde Consortium ug Metro Pacific Investment Corporation pinaagi sa ilang Joint Venture Agreement.
Matud ni Jose Maria Lim ang Chief Executive officer sa Metro Pacific nga ilang gitingoha nga sa bulan sa October ila nang matapos ang ilang construction and Installation sa 9 kilometer nga steel pipe line gikan sa Taguanao Bridge ngadto sa dakong tangki sa COWD sa Barangay Camaman-an.
Matud ni Lim nga ang ilang tuyo sa pag-invest sa multi million pesos nga kapital mao lamang ang pag-supply sa abonda nga tubig sa 2nd district sa Cagayan de Oro human ilang na-supply ang 60 million liter per day nga gidaghanon sa tubig sa first district ning syudad.
Matud ni Eduardo Montalban, Chairman sa Board of Director sa COWD nga lakip sa trabahoon sa Metro Pacific ang pagpalig-on sa ilang dakong tangki sa Barangay Camaman-an.
Matud ni Montalban nga ang pagkutay sa tubo sa Metro Pacific ug pagpalig-on sa ilang tangki sa Camaman-an tipik sa ilang kontrata sa COWD ug Metro Pacific Investment Corporation.
