General Santos City–Pormal nang napasakaan ug kasong pagsupak sa Article 308 sa Revise Penal Code ang suspetsado sa pagpanglabni ug kulentas nga si Niro Valenzuela, 28 Anyos nga nanimuyo sa Purok San Vicente, Barangay Poblacion, Sto. Nino, South Cotabato.
Sumala pa ni Police Major Tirso Pascual ang hepe sa Police Station 6 nga ang nasangpit nga suspect ang nagtingkagol karon sa ilahang selda ug gipaabot nalang nila nga mag pakanaog ug commitment order ang korte o dili ba kaha makabayad kini ug pyansa alang sa iyang temporaryong kagawasan.
Samtang sa nahimo matud pang pakighinabi sa kapulisan sa nahisgutan suspect gibutyag niini nga gibuhat lang niya ang pagpanglabni tungod kay grabi matud pa ang panginahanglan niini ug ang pag-snatch sa kwarta sa biktima nga si Myra Grace Jaim ang iyahang nakit-ang sulosyon.
Gidayig usab ni Major Pascual ang mga gwardya sa KCC Mall Of Gensan kay tungod matud pa sa ilang paspas nga pagresponde sa maong insidente gilayon nga nasikop ang suspect. Pasabot matud pa kini nga ginahimo gayud sa mga gwardya ang ilahang trabaho.
Kung kahinumduman nga alas 8:00 ang takna sa buntag samtang sakay sa tricycle ang biktima kauban ang suspect sa J. Catolico Avenue, barangay Lagao kalit lang nga gibira sa suspect ang kulentas sa nahisgutang biktima nga nagkantidad ug 9,500 ka pesos.(Dave Silagan)
