General Santos City—Hingpit nang napasakaan ug kaso sa Police Station 2 ang tulo ka mga gwardya sa pamilyang Olarte nga nakabase sa Purok San Vicente, Barangay Labangal kansa gitudlong nagpabuto ug pusil niadtong mga nakalabayng adlaw.
Sumala ni Police Chief Inspector Jeng Salarda, Hepe sa Police Station 2 nga gihinayon gyud sa mga complainant nga residenti sa Purok Saludin, Barangay Labangal ang pagpasang-at ug kaso human silang gipamusil sa mga gwardyang silang si Jay-ar Omega, 24 anyos, Espidito Dela Peña, 54 anyos ug Ronald Manib, 32 anyos.
Walay naigo sa insidenti, apan nakamugna kini ug kahadlok sa mga biktima.Dugang pagbutyag ni PCI Salarda nga matag grupo adunay mga kaugalingong bersyon kalabutan sa insidenti.
Apan tungod may nakuha silang mga empty shell sa lugar, pasabot nga aduna gyuy nagpabuto ug pusil. Iyang giawhag ang mga gikasuhang gwardya nga depensahan nalang ang ilang kaugalingon ngadto sa Korte.
