General Santos City–Takdang pasakaan ug kasong pagsupak sa presidential decree 1602 kon Illegal Number Games ang 3 ka mga indibidwal nga silang Ramil Pacatang, legal age, residenti sa Prk. Fatima, Barangay Dadiangas West; Ronald Lumerosa, 24, nga nanimuyo sa Prk. Saludin, Barangay Labangal ug usa ka Romeo Villanueva Valeria, 46 anyos, tricycle driver, residenti sa New Society, Barangay Apopong human nga maaktohan kini sa gipahigayong Saturation Drive sa Police Station 1 sa pag panguna ni PSI Abdusalam Mamalinta ang hepe sa Police Station 1.
Sumala pa ni PSI Mamalinta nga nakadawat sila ug report nga nagpadayon gihapon ang operasyon sa iligal nga sugal sa ilang area partikular na ang hantak kung diin magsugod matud pa ang mga nasangpit alas 11:00 sa gabie ngadto na sa alas 3:00 sa kaadlawon hinungdan nga ilang gipahigayonan ug operasyon.
Naaktohan matud pa ang mga nasangpit nga naghantak alas 3:12 ang takna sa kaadlawon sa Balimbing St. Barangay Dadiangas North hinungdan nga gisikop.
Nakumpiska sa kapulisan ang mga gambling paraphernalia, 2 ka coins, ug 400 pesos nga taya sa mga nasangpit. Sa kasamtangan nag tingkagol na sa Police Station 1 ang mga suspect.(Dave Silagan)
