General Santos City—Usa ang patay samtang duha ang kritikal human nga disgrasyang nasangit ang usa ka prime mover truck sa wire nga miresulta sa pagkahagba sa posting gisak-an sa tulo ka mga biktima sa may national highway, sakop sa Barangay Labangal, atubangan mismo sa Social Security System Office alas 10:00 pasado ang takna sa buntag, July 11, 2017.
Sumala ni PO2 Rene Boy Navarro- imbestigador sa Traffic Management Unit (TMU), dead on arrival sa Doctors Hospital ang lined man nga si Micheal Camasura 28 anyos nga taga Compostela Valley. Kritikal usab ang mga kaubanan niining mga lined man sa PLDT nga sila si John Mark Cano, 18, residenti sa Mati Davao Oriental ug si Banjo Kitkitin, 21, nga taga Davao City.
Matud ni PO2 Navarro nga makapila ka higayong nasangit ang wire ug wala mabantayan sa mga line man hangtud nga nalabyan kini sa prime mover nga dunay plakang LBS 445 nga iya sa Bostus Trucking nga nakabase sa Polomolok, south Cotabato kansa gimanihuan ni Joel Deneros 46 anyos.
Didto na nabira ang wire nga miresulta sa pagkatumba sa poste nga gisakaan sa biktimang sila si Camasura ug Cano hinungdan usab silang nahulog.
Samtang ang biktimang si Kitkitin nga anaa lang sa ubos sa poste nasamdan usab tungod naigo sa mga tipaka sa kongkretong poste nga nabali tungod sa disgrasya.
kalabot sa maong panghitabo hugtanong gibarugan sa prime mover driver nga si Joel Deneros nga standard man ang sukod sa iyang gimanehoan nga truck hinungdan nga wala niya damha nga dunay wire nga masangit sa national highway.
Matud niini nga sa una niyang pag-agi wala man nahitabo ang pagkasangit apan sa iyang pagbalik didto na natigayon ang disgrasya tungod wala niya mabantayan ang nagloyloy na nga wire sa telepono nga gitaud sa mga lined man.
Matud usab ni Deneros nga walay sign board nga nakabutang sa maong lugar aron lang unta mabantayan sa mga driver aron usab nga malikayan ang susamang disgrasya.
Gihingusgan usab ni Denero nga sakto raman ang gikusgon sa iyang pagpadagan sa iyang truck tungod kay duna may laing sakyanan nga iyang gisundan niadtong higayona.
Wala matud pa niya nakit-an nga duna nay nangahulog sa poste apan nakurat nalang sya nga dunay misinggit.
Nasayran nga gikan sa Makar Wharf pauli na unta ngadto sa Polomolok si Deneros dala ang prime mover nga dunay kargang mga pinya nga iya sa kompanyang Dhole Philippines.
