TACLOBAN CITY – Arestado an tulo (3) nga lalaki matapos nga tumalapas han curfew ngan ginpasakitan pa an mga kapulisan ha Brgy. 74 Lower Nulatula, Tacloban City kanina han 12:05 han kaagahon, March 25.
Subay ha report han Tacloban PNP, ginkilala an mga suspek nga hira Vic Abolencia, 25 anyos; Leanre Nacinopa, 20 anyos, usa nga laborer; ngan hi Jonathan Daa, 18 anyos pareho nga mga taga Tacloban City.
Ha mas pinahugot nga pitad kontra COVID19, nagpapatrolya an mga kapulisan ha Tacloban City, nakit-an an tulo nga suspek nga nagliliyong-liyong la gihapon ha kakalsadahan ngan waray facemasks.
Naghangyo an mga kapulisan ngan barangay tanod nga sumurender pero nagpasibo pa an mga suspek. Ginpanduso pa an mga kapulisan pero na-aresto la gihapon an mga ini.
Han madara ha police station 2-Abucay, nagpinanyakan pa an mga suspek hin malain kontra ha mga kapulisan.
Maatubang an mga suspek hin kaso ha pagtalapas han Republic act 11332 o Mandatory reporting of notifiable diseases and health events of Public Health Concern Act under Sec. 9 which prohibits non-cooperation ngan Article 151 of Revised Penal Code (Resistance and Disobedience to a person in authority)
Paslak na yana an mga suspek.
