LA CASTELLANA, NEGROS OCCIDENTAL – Kumplikto sa duta ang ginalantaw rason kon ngaa ginlabo patay sang suspek ang tatlo ka miembro sang isa ka pamilya kag pagsamad sang duha ka iban pa pasado las 11 kahapon sang aga sa Sitio Cambunay, Brgy. Cabacungan, banwa sang La Castellana.
Nakilala ang mga dead on the spot nga sanday Luis Solis, 39 kag ang duha niya ka mga kabataan nga sanday Marcelino, 11 yr. old kag Lady Eloisa, 6 yr. old samtang pilason naman ang iya common law wife nga si Jennifer Caratayo, 27 anyos kag Lourence Andrew, 13 anyos.
Nakilala naman ang suspek nga si Richard Solis Paquero, 27 anyos ang edad kag pumuluyo man sang amo nga lugar kag pakaisa manlang sang biktima.
Suno sa iloy sang suspek nga si Clarita Paquero, nagsugat-anay sa dalan ang iya anak kag ang biktima nga si Luis ang una nga nag-atake kay Richard.
Nakadalagan pa kuntani pauli si Luis sa iya balay apang ini ang ginlagas sang suspek nga si Richard kag sang nalab-ot ini siya ang ginlabo sini.
Wala pa nakuntento ang suspek bangud nga ang tanan niya nga masugata ang iya gin-atake lakip na ang 6-anyos nga bata.
Angut sini, ginpahayag ni La Castellana PNP chief, Police C/insp. Irma Teoxon nga ang kumplikto sa duta amo ang isa sa ginalantaw posible motibo sa krimen.
Sa karon padayon naman nga confine kag ginabulong sa Corazon Locsin Montelibano Memorial Regional Hospital ang mag-iloy./dyHB BACOLOD
