Tulo ang patay sa aksidente sa dalan sa Sayre Highway Brgy Maluko Manolo Fortich Bukidnon alas 9:56 sa buntag kagahapong adlawa.
Ang mao nga aksidente gilangkuban sa usa ka Mitsubishi Adventure nga gimaneho ni Prince Klerc Borja, hamtong ang pangidaron, minyo ug lumulupyo sa Sumpong, ning siyudad sa Malaybalay ug usa ka Dumptruck nga gimaneho ni Arnold Conception y Basco, 25 anyos, ulitawo ug lumulupyo sa Cabanglasan, Bukidnon.
Sa inisyal nga imbestigasyon sa Manolo Fortich Police Station nigawas nga nga paingon sa Barangay Dalwangan ang Dumptruck apan pag-abot sa lugar nahitabuan nikawat ug dalan ang Mitsubishi adventure nga paingon usab sa direksyon sa Cagayan de Oro City maoy hinungdan nga nakabangga ang duha.
Matud sa PNP-Manolo nga sakay sa Mitsubishi adventure ang lima ka mga pasahero ug usa ka driver nga daling gidala sa Bukidnon Provincial Hospital-Annex San Miguel, Manolo Fortich, Bukidnon.
Duha ka pasahero ang gideklarang Dead on Arrival (DOA) nga sila si Emmanuel Barabat ug Anecita M. Barabat samtang ang drayber sa Mitsubishi Adventure ang gideklarang patay sa Emergency Room.
Samtang anaa na sa luwas nga kahimtang ang tulo ka mga pasahero nga sila si Joey Cantarona, Maylene Cantarona ug Benjamin Sabay.
Anaa na usab sa kustodiya sa Manolo PNP ang driver sa Dumptruck alang sa tukmang disposasyon.
