Sultan Kudarat—Nagpahigayon ug Christmas party ang mga miyembro sa New People’s Army (NPA) ug Bangsamoro Islamic Freedom Fighters (BIFF) uban ang mga sundalo sa usa ka beach resort sa General Santos City.
Ang maong mga kanhing rebelde ang misurender sa probinsya sa Sultan Kudarat. Tumong sa 33rd Infantry Battalion nga mapabati sa kanhing mga rebelde ang pag-atiman kanila sa kasundaluhan ug sa gobyerno.
Gikalipay usab sa mga kanhing rebeldi ang gihatag nga pagtagad kanila sa mga sundalo inubanan sa gobyerno sa nasud.
Usa ka kanhing Field Commander sa BIFF ang nagsulti nga unang higayon niyang nasinatian nga magdula ug parlor Games uban ang mga kasundaluhan ug kanhing miyembro sa NPA butang nga iyang gikalipay.
Nasayran nga mukabat na sa 200 ka mga rebeldeng komunista ug 32 ka BIFF ang mingtahan sa ilang kaugalingon sa 33rd IB sugod niadtong Mayo 2017.
