General Santos City—Himas rehas na ang usa ka wanted nga adunay kasong murder sa Malapatan Municipal Police Station human kining nasikop sa gihimong Manhunt Charlie sa maong buhatan niadtong nakalabayng adlaw.
Alas 2:30 ang takna sa kabuntagon dihang gisikop sa mga personahe sa Malapatan Municipal Police Station ang suspek nga si Gregorio Aray, 31, residenti sa Purok Islam, Barangay Sapu Masla, Malapatan, Sarangani Province pinasikad sa warrant of Arrest sa kasong murder nga giatubang niini.
Nasayran nga una nang nakadawat ug impormasyon ang kapulisan nga nakit-an ang presensya sa suspek nga anaa sa ilang panimalay mao nga gikasa gilayon ang operasyon.
Dihang gikapkapan sa kapulisan ang suspek nakaplagan sa iyang bulsa ang duha ka pakete sa pinaugang dahon sa marijuana.
Sa karon commitment order nalang ang gihuwat aron nga mabalhin na kini sa Sarangani Provincial Jail.
