Gikalipay sa trayntay-uno (31) kabuok sidewalk/street vendor sa lungsod sa Malapatan nga gitagaan silag ayudang pinansyal sa Municipal Government sa Malapatan ug sa Provincial Government sa Sarangani human nga apektado ang ilang pwesto sa nagpadayon nga nationwide road clearing operation alayon sa kamanduan nila Pangulong Rodrigo Duterte ug DILG Secretary Eduardo Año subay sa DILG Memorandum Circular No. 2019-121.
Segun nila Manong William Legaspi, singkwentay-uno (51) anyos nanag-iya og bakery, Manang Gloria Homecillo, saysentay-singko anyos (65) nga gabaligya og mga gulay, ug si Manong Fortunato Orongan, setentay-dos (72) anyos gapamaligya og mga school supplies, dako nang tabang matud pa ang gi-ayuda sa lokal nga gobyerno nga niabot og Dose Mil ka pesos (P12K) matag usa kanila, aduna na matud pa silay pang-kapital sa ilang pagbalhin.
Matud pa nila Governor Steve Chiongbian Solon ug Malapatan Mayor Jun Sumbo nga personal nitunol sa maong ayudang pinansyal ato lang adlaw nga Hwebes, dili matud pa kabubut-on sa lokal nga gobyerno nga papahawaon sila tungod kay nindot na ang ilang pagkahimutang alang sa ilang panginabuhian. Apan sa direktiba sa nasyonal nga gobyerno ug nakita man usab matud pa ang maayong epekto niini sa kadaghanan nga walay sagabal ug walay illegal structure ang kilid sa mga kalsada aron paspas lang kining maagian hilabi na panahon sa emerhensya, gikinahanglan na matud pa silang i-relocate.
Sayud man matud pa sila sa pagsugod pa lang nga gidid-an na sa balaod ang pagtinda nga makaapekto sa mga gaagi sa national highway. Safety pud ang mga kabataan ug kunsumante kung dili kilid sa dalan magpunsisok. Nagpasalamat na lamang si Mayor Sumbo ngadto kang Governor Solon tungod wala matud pa sila pasagdi.
Sa DILG Memorandum Circular No. 2019-121 nga gipagawas ni DILG Secretary Año, mag-atubang og kaso ug silot administratibo ang kapitan, mayor ug gobernador nga wala mupatuman sa road clearing operation tibuok Pilipinas.
Sa habig ni DILG Sarangani Provincial Director Engr. Samuel Camaganacan, iyang gidayig si Governor Solon ug ang tanang mayores sa Sarangani Province tungod sa pagpaningkamot nga padayong mapatuman ang road clearing operation sa mga municipal ug provincial road. Matag quarter na matud magpahigayon og inspection/validation kung padayong gi-implementa ang balaod. Suportado usab kini nila Senador Manny ug Congressman Ruel Pacquiao, Vice Governor Elmer De Peralta ug tanang board member.
Photos: MIO Malapatan FB, Jake Narte
