General Santos City–Nagtingkagol sa selda sa Polomolok Police Station ang usa ka 32 anyos nga lalaki nga naila sa pangalang Espirijun Montemor Residente sa purok 7, Barangay Glamang, Polomolok, South Cotabato, human nasikop sa kapolisan nga naghupot og armas nga walay igong dokumento.
Alas 12:40 sa sayong kabuntagon nagpahigayon og oplan kapkap bakal ang mga personahe sa Polomolok PNP sa pagpanguna ni Police Sr. Inspector Romeo Albano Jr . ang Deputy Station Commander sa Polomolok PNP pinaagi usab sa kamanduan ni Police Supt. Samuel Cadungon sa usa ka videoke bar sa Cannery Road, Purok San Miguel, Barangay Poblacion, Polomolok.
Malamposong nasikop ang nasampit nga dinakpan nga naaktuhan nga nakapkapan sa kapolisan nga naghupot og cal.22 sa matang armas nga gibutang sa hawak niini.
Gilayon kinig gisikop gumikan kay walay igong dokumento nga gipresentar sa kapolisan sa gihugtan niining armas.
Samtang giandam na usab ang kasong pagsupak sa RA 10591 kon Illegal Possession Of Fire Arms ngadto na sa suspek. (Raynald Timario)
