General Santos City—patay ang usa ka 33 anyos nga lalaki human kining gipusil sa wala pa mailhing suspetsado samtang kini nagmaniho sa iyang motorsiklo pauli na unta sa ilang panimalay sa Gensan Vill., Barangay Bula Gensan.
Ang biktima nailhang si Jomar Alpeche, 33, residenti sa samang lugar. Alas 6:00 ang takna sa gabie dihang gipusil ang biktima sa suspeknga sakay sa motorsiklo nga XRM kolor pula.
Sumala ni Ellen Mae Caracotdacot, live in partner sa biktima nga gikan sila sa Prk. Malakas, Barangay San Isidro nagkuha ug sund-an nga ilang gipa-cater alang sa birthday sa ilang pag umangkon.
Sakay ang iyang kapuyo sa ilang motorsiklo samtang siya sakay sa traysikad tungod duna kini karga nga pagkaon. Pag abot sa Amao Road, paliko na unta sa Gensan Vill, kalit lang syang nakadungog ug buto sa pusil ug didto iya nalang naayran nga gipusil na ang biktima.
Nasayran nga lima ka mga samad pinusilan ang naangkon niini sa nagkandaiyang parti sa kalawasan apil na sa iyang ulo. Paspas matud pang nakasibat ang suspek padulong sa sentrong bahin sa syudad samtang ang biktima wala na nadala pa sa ospital human gibawian dayon ug kinabuhi.
Sumala ni Ellen Mae nga wala siya masayud unsay motibo sa pagpatay sa iyang live-in partner. Wala man kini atraso ug labaw sa tanan wala man kini nalambigit sa unsa mang iligal. Bugtong bisyo sa iyang kapuyo ang sabong tungod makaabot pa kini sa ubang lugar aron lang manabong.
Samtang gikumeprma usab ni Ellen Mae nga biktima usab sa pagpamusil ang igsuon sa biktima niadtong tuig 2015 apan iyang gihingusgan nga wala kini koneksyon sa pagpamusil kang Alpeche tungod motibo sa pagpatay sa igsuon niini ang bahin lang sa lalis tungod sa kanal.
Samtang ang Bula Police Station naghimo nag makuting imbistigasyon kalabutan sa insidenti. Sa kasamtangan sila blangko pa sa motibo sa krimen ug gani padayon pa ang ilang pakig-alayon ngadto sa pamilya sa biktima ug sa mga higala niini sa pamasin nga duna silay makuhang lead sa pagpatay sa nahisgutan.
