Roxas City, Capiz – Isa ang patay samtang duha ang pilason sa bunggoanay sang duha ka mga motorsiklo sa Arnaldo Boulevard Brgy Baybay sining syudad alas 10:15 kagab-i.
Wala gid matabangan sang gindangat sa ospital ang amay nga nakilala kay Eugene Rick Benliro y dela Cruz, 34-anyos ang pang-edaron matapos nag-angkon sang patal nga pilas sa iya ulo sang naglampos ang ginasakyan nga motor sa sementado nga dalan.
Samtang kritikal man kag padayon nga ginabulong sa ospital ang anak sini nga 12-anyos matapos nga nag-angkon sang kapilasan sa lawas.
Pilason man ang nakabunggo nga driver sang motorsiklo nga nakilala kay John Rico Valderas sang banwa sang Ivisan apang nagapuyo na sa banwa sang Sigma.
Suno sa panaysayon sang isa sa mga nakasaksi nga nakilala kay Junel Agana, nakita sini nga madasig ang padalagan ni Valderas sang motorsiklo sang gulpi nga ginbunggoan ang nagminor na nga mga biktima.
Bangud sa kabaskugon sang pagkabunggo, naapok ang mga ini sa ginasakyan nga motorsiklo. Gindangat sa Roxas Memorial Provincial Hospital(RMPH) ang mag-amay apang gindeklarar nga dead-on-arriva si Eugene Rick Benliro.
Padayon pa ang imbestigasyon sang mga kapulisan sa nasambitan nga insidente.
photo(c)- Jeremiah Obera
