Davao City – Opisyal nga gilusad sa lokal nga panggamhanan sa Davao karong adlawa, July 8, ang ika-34 nga Kadayawan Festival dinhi sa dakbayan sa Davao.
Kini gipangulohan mismo ni Davao City Mayor Sara Duterte-Carpio kinsa sa iyang mensahe gi-awhag ang katawhan nga mutambong ug makiglipay sabay sa pagkasayod sa mga kaagi ug paghulma sa kultura sa 11 ka mga tribu nga nanimuyo sa syudad.
“We have been blessed not just with natural resources but favorable climate conditions, a thriving economy and peace and order,” segun niini.
Gani gidasig niini partikular ang mga Lumad, Muslim ug Kristyano nga mutambong sa mga gihanyag nga aktibidad aron mas maila ang matag kinaiya nga naghiniusa.
Samtang gikanayon ni Davao City Tourism Operations Office head Generose Tecson nga ang kalahian karong tuig nga selebrasyon mao ang pagpakatag sa mga aktibidades sa tibuok bulan diin muarangkada kini sa Agosto 2.
Tutukan sa karon nga Kadayawan ang bantan-on kun cultural shows nga nagapakita sa tradisyon ug sayaw sa managlahing tribu ingon man ang Dula Kadayawan alang sa mga tribal games.
Butyag ni Tecson mokabat sa P70M ang pondo sa maong aktibidad diin P20M gikan sa lokal nga panggamhanan samtang P50M maggikan sa mga pribadong sektor.
RadyoMaN Jason Amisola
