Labangan, Zamboanga del Sur – Nadugangan na usab ang mga sundalong andam na nga makigbatok sa kaaway sa gobyerno.
Mokabat 381 ka mga private nga sundalo ang andam na nga e deploy human malampusong natapos niini ang 1st class of Infantry Operations Course (INFOC) .
Kini ang mapasigarbuhong gianunsyo sa 1st Infantry Tabak Division kagahapong adlawa sa Kuta Sang-an, Upper Pulacan, Labangan ning probinsya.
Ang INFOC mao ang kanhing ilado sa tawag nga Jungle Warfare Mountain Operations Course nga gigahin alang sa mga bag-ong gradwar nga candidate soldiers.
Gidisenyo ang maong pagbansay arun sa tinguha nga madugangan ug mausab ang mga subjects arun mahulma ang matag abilidad sa matag usa ka sundalo ug mapalambo pa ang kahibalo nga ilang nakat-onan atol sa basic military training.
Gi-congratulate ni 1st Infantry Division Commander Major Gen. Gene Ponio, ang tanang mga tinun-an, mga ginikanan parenti ug uban gumikan sa padayun niining pagdasig ug paglig-on sa mga bag-ong sundalo.
Sigon ni Ponio, usa matud pa kini ka markadong panghitabo gumikan kay laing world-class soldiers ang napalugwa ug naumol isip professionals.
Sa katapusan, gisaad sa commander nga magapadayun sila sa pagbansay ug pagdisplina sa mga sundalo arun maseerbisyuan ang mga katawhan nga nagpuyo sa Western Mindanao”.
(Photo: 1st Infantry (Tabak) Division)
