Mokabat sa 39 ka mga residente sa barangay Dansolihon ang nadala sa duha ka government hospitals sa Cagayan de Oro human nabiktima sa food poisoning sa Barangay Dansolihon ning syudad kagabi-e.
Matud ni City Health Officer Dr. Fe Bongcas nga mokabat sa 37 ka mga pasyente ang nadala sa J.R. Borja General Hospital ug duha ang nadala sa Northern Mindanao Medical Center NMMC sa dihang ang maong mga pasyente nakasinati sa suka ug kalibang kagabi-e.
Gibutyag ni Bongcas nga tungod sa maong hitabo iya nang ipadala sa Sitio Eva sa Barangay Dansolihon ang iyang mga health officials aron pagsusi kon unsay tinood nga nahitabo sa maong mga pasyente.
Sa unang reports nga nadawat ni Dr. Bongcas nagbutyag nga ang mga mag-uuma nga residente sa Sitio Eva sa Barangay Dansolihon ug silingan nga mga sityo nagpahigayon sa ilang tigom-tigom kagabi-e.
Mga alas 7 kagabi-e, nanihapon ang maong mga residente ug usa sa ilang gikaon ang sud-an nga bam-e.
Apan matud ni Bongcas nga human sa ilang pahinapon sa maong mga residente, nagsakit ang tiyan ug nagkalibanga ang mga bata lakip mga hamtong ug mga tigulang hinongdan nga gidala kini sa ilang mga silingan sa City hospital ug sa NMMC.
Hino-on matud ni Bongcas nga out patient na ang maong mga pasyente human gi-atiman sa mga doktor.
Matud ni Bongcas nga iyang gitahasan ang iyang mga health personnel nga ilang susihon unsa nga klasi sa pagkaon ang gikaon sa mga pasyente kagabie aron ilang masayran kon food poisoning ba gayud ug dili ang nahitabo sa maong mga residente.
