Nahimong mabulukon ang ika-4 nga anibersaryo sa Tatak RMN Fan’s Club, Inc. nga natigayon kaniadtong Marso 8 ning tuiga sa Barangay Covered Court, San Jose, Malaybalay City.
Ang mao nga kalihukan gitambungan sa halos 800 ka mga coordinators sa 13 ka mga chapters sa tibook probinsya sa Bukidnon.
Sa iyang state of the club address, gipasalamatan ni Station Manager Richard Villaronte, nga mao usab ang founder ug chairman sa organisasyon ang mga bulawanong kakugi nga gitampo ug panaghiusa sa mga coordinators ug mga miyembro niini.
Base sa datos, mukabat sa P4,764,750 pesos ang na-release nga tabang sa fans club gikan sa Enero hangtod Disyembre 2018 alang sa mga hingtungdan sa 1,153 nga mga miyembro nga nitaliwan.
Gipasalig pa ni SM Villaronte nga walay kurapsiyon sulod sa organisasyon. Gihatagan usab niini ug kagawasan ang mga miyembro nga mupili sa ilang mga kandidato sa nagsingabot nga elekisyon dungan sa hangyo sa mga coordinators nga dili gamiton ang fans club alang sa ilang personal nga katuyuan ug interes ug gidili usab ang paggamit sa organisasyon diha sa usa ka politikanhong kalihukan.
Ang Tatak RMN Fans Club, Inc. gimugna tumong nga matabangan ang mga miyembro niini ilabina ang anaa sa kawad-on basta nasunod lamang ang palisiya sa organisasyon.
Kabahin kini sa Corporate Social Responsibility (CSR) sa radio station isip baylo sa suking tigpaminaw sa ilang kanunay nga pagpaminaw sa RMN DXMB Malaybalay.
Usa kini ka non-profit organisasyon sa mga tawong nagkahiusa nga tumong ug tuyo mao ang pagtabang sa uban.
Ang death assistance usa lamang sa mga programa sa Tatak RMN Fans’ Club gawas sa tree-planting, medical mission, clean up drive ug feeding program.
